容祖兒放棄休息唱第八場 觀眾一張「飛」可以睇兩次

 容祖兒演唱會進入第八場,本來當晚應是休息日,但因為頭場機件故障,所以祖兒放棄休息,把這日作為補場,九成九觀眾都沒有放棄睇多次機會,再次入場。

 開場不久,祖兒望見九成九觀眾再次返場,疑似眼濕濕,向觀眾說:「唔知點解,今晚特別感動嘅.......」 唱完第一part,祖兒同觀眾打招呼:「hello,好特別,今晚係好特別晚上,特別場,未試過一張飛可以睇兩次!無論你今晚係唔係第二次來睇,我希望唔會有第三次,哈哈哈,唔好意思又叫你再來.......

 無論你第幾次,作為今晚主場,我一定盡我努力去演出,令大家有兩小時開心感覺,多謝你地。」觀眾報以無限歡呼,祖兒繼續話:「其實你地之前係睇拉闊,冇特別製作,以歌會友,今晚先係紅館。同大家分享下這個舞台啦,這個舞台係一個英國舞台設計師Es Devlin同我設計,佢幫過好多國際巨星做演唱會舞台,例如Beyoncé、Kanye West、Lady Gaga、Adele、Rihanna、Katy Perry、好開心我能夠成為佢第一個亞洲區合作歌手,無咩好講啦,總之如果你係iphone的話,我今晚就係你奶媽,會幫你叉爆電,其他說話留係我歌裡面同大家講。」

 由於是特別場,祖兒之前並無預算,沒有邀請到嘉賓來幫忙,昨晚特別來賓環節,臨時把以朋友身份來睇騷的張信哲拉上台。

 祖兒同觀眾講:「第一晚嘉賓係張學友,大家都記得啦。唔係以為今晚都係佢呀?神呀,點會連續兩次來同你地玩?你地係咪傻架?哈哈.....

 張學友就冇啦,我睇下先,張學友個細佬就係到.....張家輝!」

 觀眾馬上望向VIP席上,坐楊受成隔離家輝,家輝也大方揭起cap帽跟大家打招呼,祖兒笑住話,「講唱歌未必係佢強項。(觀眾大叫家輝上台)唔好搞佢,不如我地視線再移兩個位,嘩,呢度到有另一個姓張,張信哲先生!阿哲多年前同我做過音樂會,二0一五還是二0一六年?合作做過〈我是歌手〉,我同張信哲好有緣份架!佢好似好耐冇係香港演出,大家覺得點呀,不如試下用誠意打動張信哲先生啦!」

 VIP位上阿哲被突如其來的邀請嚇一跳,不停耍手示意沒準備,唔好唔好。但祖兒不肯放過他,「你得嘅,你開緊巡迴演唱會,你把聲都開晒啦!」然後帶領全場觀眾不停大叫張信哲!張信哲!結果阿哲推不掉從觀眾席上台。

 阿哲上台後,尷尷尬尬道,「哎也,我沒有要來當嘉賓!我是來幫你加油啊!你的演唱會導演也是我的巡唱導演!我來幫你們打氣。我被嚇倒啦。」祖兒安慰阿哲說,「沒關係啦,你整個人都好Ready啦,整個粉紅色,大家說帥不帥?」觀眾都回話:「帥!」阿哲笑道,「帥我承認啦!但是沒準備啦」

 祖兒話,「你的首本名曲,我們每個人也想聽,我用一個鋼琴為你伴奏可以嗎?」繼而琴聲響起,兩人合唱「愛如潮水」觀眾掌聲雷動。

 一首之後,祖兒嫌未夠,拉著不肯讓阿哲走,「跟你合唱真的好多好多回憶,你不要想走,可不可以唱多一首歌!這首歌我這個演唱會沒唱,既然你係到,唱埋佢啦。」阿哲:「你好多歌我都識,但係邊首,有冇歌詞呀喂...」接著兩人再跟全場觀眾大合唱「習慣失戀」把現場氣氛推到最高。◇