女歌手施匡翹早前確診新冠肺炎，成為香港首宗確診女藝人，目前已安排入住渡假屋形式嘅隔離營，她更在獨立房間內做直播，除咗報平安及感謝一班醫護人員，同時分享確診的感受及面對新冠肺炎心得，同時亦為一眾病人打氣。

　施匡翹興奮道：「我好掛住所有嘢呀！我都好掛住呢個世界！因為實在發生太多事，完全係唔知點樣去面對，有太多朋友關心我而家點樣，所以我想畀人知我冇嘢，我覺得我好健康。」對於有網上討論區瘋傳，指施匡翹於留院期間要求醫院在其膳食中加鹽，惹來爭論及負評，她亦有提及此事：「其實我有睇留言，當我被隔離喺醫院時候好悶，我知好多人會上網攻擊、批評我，起初難以接受，而且好多人唔知道事實嘅真相，點解可以亂傳，但我已經接受咗，因為作為公眾人物，應該要承受呢啲事，所以已經唔會喺網上回應，因為真的冇做過，如果信我嘅人就會相信。

　關於食鹽個post，我覺得太搞笑啦，呢十幾日經歷咗太多波折，由確診開始好徬徨，呢個經歷好特別，都有少少睇化咗，當然畀我揀，我唔想經歷呢啲事，冇人想用唔舒服去被人關注，有晚我忍唔住喊咗出嚟，反問點解會咁樣？點解會發生呢啲事？仲有，啲報道點解會咁？其實開Live最直接，可以直接問到我有關肺炎資訊，我亦藉此提醒大家千祈要小心，有啲嘢預計唔到會中咗，好似我咁由一開始到而家都係冇病徵，真係好可怕。」

　施匡翹又憶述當日知道經理人確診後去做檢測，換上照肺袍等結果，坐足五小時後接到醫生確診來電，當時難以置信，不斷反問：「點解會咁！」畢生難忘，亦啟發她體會到人生無常，要珍惜身邊人。◇