太極樂隊演唱會舉行在即，門票於本月二十三日公開發售，早前亦發佈海報消息及一系列宣傳攻勢。呢日更展出隊員Gary Tong拍攝海報的幕後花絮照片，隊友們聚首一堂，西裝骨骨有別平時「Band仔」造型。當時Gary Tong預測演唱會舉行時，疫情將會過去，叫Fans準備寫心意卡表達愛意。

　而Joey Tang就話睇唔慣隊友咁斯文，全靠造型師幫忙變靚仔：「因為今次搵咗黎明御用造型師幫手，所以大家都Sharp晒，我唔敢講係『黎明Look』，我只係黎明身邊飛過嘅一隻小雀仔！今次宣傳片都好勁，用埋特技去製作，將我地啲樣變老曬，總之就係負責彈琴就得㗎嘢，」

　拍攝期間主音雷有輝「爆呔」，要工作人員幫忙「補褲」場面尷尬：「因為我地著西裝，啲衫太貼身啦，我執嘢時就聽到一吓聲，就知道出事喇！我都想演唱會可以著到咁靚仔，可以夾兩三首嘅，不過Ricky一定會打鼓打到爆晒衫！」

　鼓手Ricky笑稱自己似「賣保險」，笑言自己不及主音Patrick靚仔，甘願將靚西裝讓予對方：「佢套西裝其實我都有著過，但我Carry唔到嘛，又唔及佢靚仔，一場兄弟讓畀佢啦！今次呢個騷八月七至八日紅館舉行，今次好多朋友嚟支持我哋，到時都可能會OverRun要罰錢。」◇