《家族榮耀之繼承者》下星期一（13號）就會再掀起家族爭執，TVB繼早前公開集合17名主演大頭Close up嘅宣傳預告打造最強戲勢，連日來亦先後推出一系列圍繞佘詩曼 Charmaine Sheh ；羅子溢「羅仲謙」Him Law ；同羅嘉良（撈家）權鬥，仲有佘詩曼、林峯Raymond Lam ；羅子溢、羅嘉良嘅角色介紹宣傳片。片段所見，相隔9年再度合作嘅阿佘同林峯除咗眼神充滿愛意，亦曝光兩人唯美又浪漫嘅親吻片段。至於家族繼承者之戰，主要角力人物係阿佘飾演嘅丘皓兒同羅子溢飾演嘅丘智斌，而林峯飾演嘅高浚同撈家飾演嘅丘守義，就分別係協助二人爭奪繼承者寶座嘅重要角色。

　羅子溢呢次挑戰從演十多年以來最奸嘅角色，除咗玩世不恭、沉迷享樂同女色外，為咗爭權同達到目的，仲會罔顧情義同親情不擇手段。子溢劇中每個眼神都饒有深意，唔係別具挑釁意味、就係怒火中燒，同阿佘嘅清澈自信眼神形成強烈對比同時。另一重點，繼阿佘被掌摑片段曝光後，新系列宣傳片亦曝光咗撈家怒摑羅子溢、梁靖琪同吳岱融嘅精彩片段。除咗權鬥，作為大家族嘅丘家，家中宮鬥自然亦無日無之，丘家大少奶朱麗琪（陳靜飾），手持利刀準備刺向二少奶戴綺婷（ 余安安飾），似乎宮鬥重任落喺二人身上。

　煲劇做定熱身，睇熟7大重要「權鬥」及「宮鬥」角色人物性格，繼承者之戰核心權鬥人物角色介紹：

　丘皓兒（佘詩曼飾）

　能幹好強嘅丘家長孫女，有勇有謀，處事周全，顧念親情，機智聰穎，永遠將家族榮耀同公司利益放喺首位，係剛柔並重嘅女強人。雖然皓兒花盡努力同汗水證明自己，奈何因為女兒身關係從小到大被睇低一線，仲要同時面對二叔丘守義（羅家良飾）同守義兒子丘智斌（羅子溢飾）嘅打壓，難得係皓兒依然對公司盡忠賣力，終感動丘老太爺委以集團代主席重任，可惜呢個轉機卻引發更激烈嘅繼承者爭奪戰。

　丘智斌（羅子溢飾）

　聰明能幹，係丘家第三代嘅唯一男孫。智斌表面玩世不恭，沉迷玩樂同女色，加上性格衝動、經常四處闖禍，令父親丘守義相當頭痛。事業方面，具備一定實力嘅智斌為咗自保同達到目的，不惜犧牲任何人，係心狠手辣、詭計多端嘅壞角色。一直自以為係集團唯一繼承人嘅智斌，因皓兒被委任為代主席產生危機感，露出兇悍陰險真面目同父親守義聯手與皓兒背水一戰。

　高浚（林峯飾）

　表面風流倜儻、風趣幽默，擅長遊走法律灰色地帶，係一名機智聰敏、重情重義嘅律師。因父親高成（吳岱融飾）曾經喺丘家任職司機，同皓兒、智斌等係青梅竹馬嘅好友，加上高成經常叮囑高浚要對丘家知恩圖報，長大後專責為丘家各人解決種種棘手事件，深得丘家各人信任。同皓兒日久生情成為情侶，可惜因為一個錯誤分手收場，雖留有遺憾但二人仍視對方為一生最愛，高浚仲係皓兒喺繼承者之戰中嘅最強後盾。

　丘守義（羅嘉良飾）

　從小成績卓越、目標清晰，行事風格果斷冷靜，年輕時憑著過人魄力同能力成為當時商界最矚目青年才俊，憑實力喺集團累積咗一定嘅支持同人脈。雖然商業實力非凡，礙於父親丘瀚洋（劉江飾）思想傳統、重男輕女，守義以超乎想像手段令太太戴綺婷（余安安飾）誕下男嬰丘智斌，自此父憑子貴。但隨著皓兒獲委任集團代主席，守義為咗守住自己同兒子嘅江山，處處阻撓皓兒大展拳腳，深信薑始終係老係辣嘅守義，出手從不手軟。

　丘守仁（許紹雄飾）

　性格軟弱、零殺傷力、以遊戲人間為大前提嘅丘瀚洋大兒子、亦係丘氏集團掛名董事。年輕時因未能誕下兒子喺家族競爭中慘敗嘅守仁，從此變成零鬥心，對家族事務置身事外之餘，並以嬉皮笑臉、享受逸樂嘅姿態度日，以此作為保護色。守仁嘅「龜縮」，換來同野心勃勃弟弟守義多年嘅和睦相處，同時亦令女兒皓兒失卻依靠、要孤軍作戰。

　丘家後宮權鬥人物角色介紹：

　朱麗琪（陳靜飾）

　出生低微，因父母雙亡關係，從小寄人籬下，由舅父舅母撫養長大。受盡冷眼和貧窮折磨嘅麗琪，堅信愛情、朋友同親人都係過眼雲煙，惟有金錢才係永恒；由於深諳外在條件得天獨厚，毅然恃靚行兇，混入模特兒界後，再處心積累嫁給比自己年長30歲嘅丘守仁成為丘家大少奶。雖然自此衣食無憂，但卻要同時面對昔日黑材料的威脅，同丘家二少奶戴綺婷嘅冷嘲熱諷，不過生性剛烈嘅麗琪亦不甘示弱，妯娌倆經常槍來劍往、雞犬不寧。

　戴綺婷（余安安飾）

　丘守義法定妻子，囂張跋扈、自視甚高，一生沒經歷過甚麼風浪，喺爾虞我詐嘅豪門裏沒有太強戰鬥力，唯一技倆就係恃勢凌人同發爛渣！由於出身名門，加上守仁同元配離婚後大少奶位置空缺多年，令升呢「後宮之主」嘅綺婷喺丘家耀武揚威足足十數年之久。直至朱麗琪嫁進丘家，戴綺婷地位不再，加上本身討厭憑美色上位嘅女人，故一直視朱麗琪為狐狸精兼眼中釘，妯娌之間嘅連場惡鬥與繼承者之戰同樣精彩。

　《家族榮耀之繼承者》5月13號起逢星期一至五晚20:30翡翠台。◇