無綫全新戀愛綜藝真人騷《Funki Finance呈獻：女神配對計劃》，上周日（8日）首播後在兩地網絡贏盡焦點熱話，當中曾展望GM勇敢站出來、向心儀女神葉蒨文Sophie真誠表白一幕，令節目及兩位當事人齊齊人氣勁升。

　承接上周節目尾預告，Baby face將於第二集隆重登場，就連花生團的森美及戴祖儀也表示期待，森美：「睇下監製夠唔夠膽畀Baby face入。」戴祖儀：「我願意用自己條鏈畀佢入去追Maggie。」報稱現職Kol，年薪超過36萬的Baby face，還未「開幕」已先聲奪人向Maggie示愛：「唱歌搞笑我專長，你肯揀我你實變強」；眼見Maggie唔識反應，向來敢作敢為的Sophie即爽快幫忙撳燈令Baby face有出場表白機會。為了贏得苦戀已久的女神芳心，Baby face使出四大爆笑冧女絕殺，派心、唱情歌、耍拳及Ironman式示愛！

　首先，Baby face一見到Maggie，即出奇不意向女方大送「心心」；之後，自稱偶爾會獲邀登台唱歌搞氣氛的Baby face，按主持阿Bob要求獻唱飲歌《黑玻璃》，雖然全程甩beat兼與原作有頗大出入，但Baby face依然唱得投入，還將最後一句歌詞改為「情路背後藏～Maggie」，配以自信滿滿的情深眼神，相當啜核。為了向Maggie展示Man爆一面，Baby face即席表演拳擊，透過鏡頭都能感受到超強掌風，令全場女神為之驚艷。最後，被Maggie要求行到其面前作「霸道總裁式」示愛的Baby face，先來一招靜止時間長達半分鐘的Ironman式招牌動作、配以有力眼神向Maggie展示超強愛意。

　雖然以上四招明顯搞笑成份居多，但最後Baby face以一招出奇不意的終極大絕，令現場所有女神、阿Bob、甚至花生團都大為感動，近距離直擊「Baby face大絕」的葉蒨文驚嘆：「好真心呀！我好近距離見到佢嘅眼神。」羅毓儀：「佢呢下好Man呀！」就連當事人Maggie，亦坦言被感動，並大讚今次再見Baby face，感覺對方各方面都進步不少：「我覺得Baby face由內到外都進步咗好多，你靚仔咗。」想親身見證Baby face的誠意、創意及出奇不意最終能否打動女神Maggie，密切留意15日播出的第二集。

　而首集播出後受盡關注的葉蒨文Sophie及曾展望GM這一對，在第二集中亦會有不少甜蜜互動，絕對不容錯過。周日一集除了有海選下半場，還會率先曝光配對成功後的首輪「約會」，每位女神都會獲得與自己3位心儀男士共晉晚餐的機會，不過她們不但要同一時間與3位男士進餐，製作組還將飯枱設計成三角形，意指被安排坐在中央位置的女神，整餐飯都會被三位男士重重包圍，認真抵死！在這輪第一位出場的Sophie，雖然全程落力搵話題兼搞氣氛應付這個尷尬場面，但一句「死喇，我唔知望邊」已充份展現不知所措面。不過當GM步入會場後，Sophie即時回覆輕鬆自如狀態，並半帶開心及興奮向GM打招呼：「Hello，曾展望！」GM亦識做地大讚Sophie：「好靚喎你今日！」豈料卻換來Sophie撒嬌責問：「平時唔靚咩？」眼見Sophie與GM一來已旁若無人打情罵俏，到底Sophie組別另外兩名參加者會如何招架？敬請密切留意第二集。

　《女神配對計劃》由有「金牌媒人」之稱的林盛斌（Bob），與「星級花生團」攜手為無綫五大女神（排名不分先後）梁敏巧（Maggie）、葉蒨文（Sophie）、李芷晴（Stephanie/Step）、關嘉敏（Carman），及羅毓儀（Yuki）公開招親搵男友，節目將於周日（15日）晚九點翡翠台播出第二集。◇