踏入2026年，「唱作王子」馮允謙（Jay)喜事一浪接一浪，元旦日在叱咤樂壇頒獎禮首次奪得男歌手金獎；首個個人戶外演唱會「BLUE MOON WANDERLUST 馮允謙演唱會2026」昨日起，一連兩日在西九文化區竹翠公園舉行；全新專輯《FRAGMENTS OF MY MIND》亦面世。

　Jay說：「去年開始籌備呢張專輯時，無諗住要咩主題，或者要求任何連貫性，好想隨意發揮，想寫乜就寫乜。結果發現每一首歌都有關於我嘅人生同埋成長，所以最後決定以《FRAGMENTS OF MY MIND》作為專輯名。」隨專輯附送一支筆，讓歌迷參與專輯創作，他說：「可以喺碟內嘅紙、相冊或者歌詞集上寫低想法，發揮想像力，或者寫啲想記低嘅事。」

　去年Jay產量甚豐，有中文歌，亦有英文歌，幾乎全都是他親自作曲，甚至參與部份歌曲填詞和MV創作。靈感滿滿的Jay，畫畫天份如何？他自信地說：「早前返加拿大屋企搵到一個箱，裏面有好畫冊，原來我細個對畫畫都幾有興趣，長大後興趣去咗音樂方面。當時我會畫啲天馬行空、好奇怪嘅嘢，雖然畫功唔係好叻，但好有想像力，細細個有呢啲興趣和培訓。依家拍MV我會想像故事，例如《See Through Ya》MV，我建議用stop motion（定格動畫）手法，用好多張相、好多圖畫、sketch（素描），可能因為我自小有呢啲興趣，先至會想放喺MV度。」

　所謂「歌迷隨偶像」Jay的歌迷畫功和創意亦得豐富，他笑說：「朋友嚟到我屋企，會以為我係自戀狂，因為我放咗好多畫或者有我個樣嘅擺設，其實都係歌迷畫畀我，佢哋真係好sweet，好多謝佢哋。」◇