HOYTV製作的大型音樂企劃《歲月如歌》，第一集除了有衛蘭、洪嘉豪，還有陳潔靈坐鎮，她會唱與哥哥張國榮合唱的《只怕不再遇上》，和林子祥的《十分十二吋》，還說用了很多時間去準備：「《十分十二吋》呢隻歌幾長，最初要我唱嘅時候我都懷疑點唱咁長嘅歌。因為隻歌有好多和音好熱鬧，我自己喺屋企做咗好多功課，唱埋啲和音，同JohnnyYim討論點先可以令首歌更熱鬧。」她又說開心見到好多好朋友：「例如夏韶聲、草蜢，仲有衛蘭，好耐冇見。同埋未試過同張天賦同台，可以話睇住佢出道。」

　陣容還有與陳潔靈識於微時的Albert區瑞強，他更分享二人相識經過：「第一次認識Elisa係因為去燒烤游水，我仲有一張我諗Elisa都冇嘅黑白照，着住比堅尼，起碼要請食三餐飯。」陳潔靈聞言就說：「你咪攞出嚟，我唔驚，驚嚇親人。」區瑞強即說：「唔會，好fit，你諗都諗到，佢未肥過。佢自己都冇，因為我哋影嘅，我有個師兄好鍾意佢。」陳潔靈笑言這是千年前恐龍時代的事。

　至於第二集Albert將演繹《陌上歸人》，該曲絕對是Albert的代表作，他坦言唱這首作品已經超過五千次：「好多歌手同我傾計時候都話，又唱嗰首歌？嗰首即係代表作啦！好厭呀！但我啱啱相反喎！如果作為一個歌手，能夠有一首經典金曲，其他人想一聽再聽，已經係不枉此生㗎喇！好多歌手唱咗好多歌，都冇一首畀人記得，雖然唱咗咁多次，但次次都唔同，因為你喺唔同嘅情況之下唱，將你自己都唔知，人哋又未聽過嘅情懷再唱出嚟！」◇