最近演出邱禮濤執導新戲的李蕙敏（Amanda）日前接受HOY主播俞詠文專訪。戲中她演一位癮君子，造型上作出不少犧牲，Amanda笑說：「作為演員，專業起上來係一定要接受到。（你最初接呢個角色係咪已經知道造型會係咁？）睇劇本未知，但我估到大概係咁，所以我第一時間就話，導演，唔化妝好唔好？佢話好。點知原來仲要化得耐啲，要再化得醜小小，要做癮君子，始終面色一定要比較灰沉。」

　演AK江熚生媽媽的Amanda也談到雙方的相處，她說：「我哋第一次見就係試造型，我覺得呢個後生仔好有禮貌，好乖。埋位時，我哋未有溝通過，我哋拖住手，佢畀到眼神我，我就覺得呢個年青人好快進入到角色。」

　歌而優則演嘅Amanda以往拍過唔少作品，包括《陰陽路之我在你左右》，她說不怕拍鬼片：「點會驚？首先你扮鬼嘅時候，會有架車喺腳下，你爭啲想笑，但當然唔可以笑。第二係好多人同你一齊，唔會驚。（呢套戲嘅導演都係邱禮濤，你覺得邱導有冇改變？）我覺得佢冇咩唔同，但係佢越來越精，好精煉，成日遇到啲演員朋友，我哋話，點解Herman一日到黑都拍戲，疫情佢又拍，冇疫情佢又拍，佢冇停過。我幾佩服同尊敬佢，佢又做過攝影師，我覺得佢對所有環節都太清楚，所以佢自己一落手，好似今次咁，好多時比預定時間早完成。」

　之後談到《高度戒備》，Amanda說這套都有邱導做攝影師，林嶺東做導演。這套戲Amanda獲提名最佳女主角，當時她唱歌受歡迎，拍戲又有好成績，對此Amanda說：「我都係盡力做好每個工作，我覺得自己喺套戲嘅表現都OK，但我真係好開心同林嶺東導演合作，因為佢揀最強嘅團隊，呢個係一個好深刻好豐富嘅經驗，覺得好榮幸有機會參加呢套戲，只係好可惜佢離開咗人世，曾經有諗過如果可以再同佢合作多一次就好啦。」

　至於音樂方面，Amanda就說一直有準備推出新歌：「等一個好嘅時機同希望有後續，但呢排會有啲音樂計劃。（可以開演唱會。你當年原本開紅館演唱會，但因為一啲原因冇開到，會唔會覺得有啲遺憾？）會㗎！快啲啦，唔該！（你要入紙先得。）有入過啊！入過好多次啦！會繼續努力。」

　兒子逐漸長大，問Amanda會否放鬆一點，她就笑說：「好啲囉！因為冇咁驚佢走咗去唔識返來，而家定性咗，又有電子設備可以追蹤。但而家變成管理佢嘅生活方面比較複雜，學校啲app、功課、補習班、運動班，好多好多嘢，我做咗佢經理人，開始教佢獨立小小。我希望佢早熟啲，我做嘢嘅時候就更加放心。」◇