已故賭王何鴻燊四房兒子何猷君與內地超模奚夢瑤自2019年登記結婚後，時隔7年，終於喺法國時間6月1號補辦世紀夢幻婚禮。過去數年因為何猷君堅持為父守孝三年，加上一對兒女相繼出世，故婚禮一再延期。

　婚禮地點選定法國諾曼第嘅多維爾莊園（Deauville）以及世界文化遺產聖米歇爾山古堡舉行。多維爾莊園風光如畫，更係新娘奚夢瑤當年模特兒事業起步嘅地方；而古堡亦係周杰倫拍攝知名MV《最偉大的作品》取景地。

　6歲兒子何廣燊（Ronaldo）同女兒Romee擔任花童，與父母一同進場，奶奶梁安琪笑逐顏開，現場星光熠熠，唔止王嘉爾飛赴法國擔任伴郎，奧運金牌得主谷愛凌亦現身祝賀。婚禮主要邀請至親好友低調進行，呢對「新婚」夫妻仲預告，計劃9月會喺澳門補辦盛大家族答謝宴。

　婚禮現場以大量鮮花溫馨佈置，而前一晚嘅歡迎晚宴上，奚夢瑤身穿一襲優雅簡約粉藍色晚禮服，更有佢配戴總重超過100卡、價值高達2億嘅頂級鑽石亮相。

　回禮禮盒燙印兩人英文名縮寫「M&M」(Ming&Mario)，當中包括頂級真絲旅行套裝、高級護膚品同米芝蓮甜點，仲附贈當年求婚場景中嘅「超級瑪利奧」公仔，隨附卡片寫上：「謝謝你為我們的故事而駐足，願和你分享此刻的愛與歡欣。」

　何猷君與奚夢瑤2017年因戀愛綜藝結緣。雖然奚夢瑤比何猷君年長6歲，不過兩人就以行動打破了外界對姊弟戀刻板印象。婚後兩人先後誕下長子何廣燊（Ronaldo）同女兒Romee，成功湊齊「好」字。◇