17日是英皇娛樂集團行政總裁霍汶希（Mani）正日生日，一向愛錫旗下藝人的她，今次被公司上下聯手反過來驚喜！曾比特（Mike）、湯怡（Kathy）、楊天宇（Angus）、李靖筠（Gladys）、曾傲棐（Arvin）、海兒（Hedy）、黃明德（Dark）、劉若寶（Polly）及一班同事秘密籌備party，等Mani開完會返公司即場送上驚喜。

　Mani一踏入公司門口，Mike便即刻拿着結他跟Dark合體自彈自唱生日歌，最後帶領全公司大合唱，連英文、廣東話及國語三個版本都唱勻。

　講到送禮物，Angus向Mani笑着自爆，「我買咗生日禮物畀你，但係唔記得帶擺咗喺屋企。」Mani一聽即刻追住Angus大叫：「拎個銀包出來，唔該。」場面搞笑；至於開餅店的Kathy就親手製作蛋糕送給Mani，Mani一見即大讚：「呢個係全香港最好味嘅蛋糕，我話畀你哋知，仲要係靚女嘅出品。」認真畀面。許願時，Mani就將願望送給大家，「祝各位所有藝人都大紅大紫、工作順利。」

　正當大家玩得開心之際，英皇集團主席楊受成剛好「路過」，楊博士即裝兕問Mani：「你好大膽喎！生日都唔請我！」Mani無奈回應：「唔係呀，我唔知道佢哋surprise我呀，我招架唔住啦，攞晒啲錢出來派啦。」楊博士見狀即刻問：「使唔使要錢呀？」更即時摷袋準備出手，非常豪氣。之後二人先合照，Mani邊拿着利是邊跟楊博士說：「老闆，今日來講，我三十三年一直都搶你啲錢啦，我今日個個都派咗一封大家都大吉大利嘅生日利是，祝你身體健康事事如意生意興隆。」然後便親手遞上利是給楊博士。楊博士接過利是就搞笑話：「可唔可以補償返我三十幾年來你呃我啲錢呢？多謝。影相先。生日快樂！」

　隨後，老闆跟人傾偈期間，Mani突然問楊博士，「咦，你諗住畀利是我嗎？」全場即刻大笑兼拍手，向來有求必應嘅楊博士二話不說即時從褲袋拿出利是。◇