回復單身不久的歐倩怡（Cindy)，近期頻頻曝光，為Hoytv皇牌節目【健康關注組】擔任多集嘉賓之外，今次更和Hoytv主持Angela俞詠文傾談心底話。

　超過20年沒有擔任幕前工作，Cindy坦言「復出」後有不少壓力：「好多人同我講，而家嘅娛樂圈同我二十幾歲時候嘅娛樂圈，分別已經好大，以前我做宣傳嘅時候，係得我一個單向面對傳媒，但而家多咗好多網上嘅媒體，只要有人留言，就會引申好多唔同嘅話題，近排都會緊張同埋驚，其實你睇返我二十幾年前嘅訪問，我都係一個好多嘢講，嗶喱巴啦嘅人!大家冇見我咁多年，可能同大家預期嘅唔同，覺得我好似冇長大過!其實我不嬲都係咁!」

　談到回到娛樂圈後，於網上平台的言論，惹來不少負評，Cindy表示極度不開心：「我完全冇諗過個訪問出街之後，會惹來咁多嘅負評，大家冇見咗我咁多年，你唔知身體出現過咩問題，我經歷過啲乜嘢，我只係純粹分享，冇任何意圖或企圖做任何嘢，坦白講嗰件事之後，我匿埋咗屋企喊咗三日三夜!我只係用我嘅真誠情示人，原來大家會接受唔到，好多前輩亦同我講你唔可以太真㗎!要識得保留，所以而家我講嘢都會小心好多！」◇