【特訊】西甲豪門皇馬完成新一任會長選舉，現任會長皮里茲冇競爭對手之下，成功連任，穩坐寶座至2029年，這位77歲西班牙富商由2009年開始，連續5次勝出會長選舉，堪稱「皇馬大帝」。不過，盛傳皇馬教練安察洛堤決定今夏離隊，意味他同皮里茲「冠軍組合」將會拆夥。

　皮里茲2000年首度成為皇馬會長，推動「星戰策略」簽入費高、施丹等球星，打造「6條A」豪華陣容。雖然「皮總」2006年下台，但3年後再次當選，並一直擔任「銀河艦隊」話事人，球隊近15年奪得5次西甲及6次歐冠冠軍等多項錦標，皮里茲政績輝煌，今次又成功連任會長，並不令人意外。

　不過，皮里茲保住會長之位，但留不住主帥安察洛堤，根據西班牙《零點電台》爆料，這位65歲意大利名帥即使尚有1年半合約在身，但已決定提早今季結束後離隊，去其他聯賽搵食，盛傳將由利華古遜教練沙比阿朗素接手領軍。

　事實上，皮里茲一早已看中沙比阿朗素，這位43歲西班牙少帥上年夏天拒絕利物浦邀請，就是等著接「肥安」班。◇